真情99

真情99、真情久久。
人生情感的紀錄，情意感動的歌詩。

人生是足濟情牽纏做伙的一齣戲。長年注心本土語文教學佮創作的作者韓滿，將伊對日常生活、人情世事的觀察佮體會，分作親情、翁某情、師生情、朋友情、有情、真情六種情。將這本散文集號作「真情99」，向望逐家久久長長，攏會當用真情相對待，予人生美麗圓滿。
人佮人之間真情對待，會引起感動，無仝款的對象，也有無仝款的情感佮故事，對性命、對歲月當中不斷生湠出來。韓滿用親切的台語，有話就直透講，有情就直透寫，替人說真情，無定若你、無定若我，用溫柔的氣口，佮你交陪。

韓滿

嘉義市國小老師兼本土輔導員退休，現任幼穎兒童臺語文學總編輯、臺灣歌仔冊會理事、嘉義市母語文化學會理事、台文戰線會員、台文筆會會員。
陸續編寫本土教材，閣製作繪本故事冊「閩南語尪仔冊」、「巧新婦」……等，2017年出版台語詩「酒蜜100」。寫作、採錄、導覽、答喙鼓、編劇、演戲等逐項來。96年得著教育部閩南語績優人員、97年教育部本土文學創作新詩第二名、散文佳作。99年海翁全國台語囡仔詩比賽第一名、103年績優臺灣文史教育有功人員。嘉義市參賽的教案、寫作、演講、朗讀、答喙鼓、電子繪本……等，毋管家己參賽抑是指導囡仔定定著頭名，退休了四界去講台語課，有台語詩、散文、演講、朗讀、答喙鼓、電子繪本、認證等相關課程佮做評審。
從早到今對台語寫作的熱情猶原無變。 2017是100首的台語詩集【酒蜜100】，紲落去共人生的各種感情匯集起來，編寫一本台語散文集【真情99】。

自序

情有真濟款，有的是若一杯水，無啥滋味，毋過時間久久袂走味；有的是若一杯茶，會芳、會甘，毋過定啉會淡薄仔痴；有的是若一杯酒，有苦、有甜，毋過啉傷雄煞會醉。
人生是足濟情牽纏做伙的一齣戲，阮共遮的情分作親情（包括爸囝情、母囝情、姊妹情）、翁某情、師生情、朋友情、有情、真情六種情。向望逐家久久長長攏會當用真情相對待，所致這本散文集就號作「真情99」。
佇落雨的暗暝若聽著江蕙的「落雨聲」，會予人觸景生情，引出沉佇甕底的一段情，文章若無「情」做背景，彼就敢若有魂無體，無病咧哼哼呻。每一篇散文攏有一个感動人的故事。故事是人生歲月中一直生出來的，有人是身份、壓力、認知等因素，心聲無愛向人吐露，阮藉著筆經過改編替人說真情，無定若你、無定若我，毋過任何一編故事攏無影射任何人。
人生本來就有圓佮缺、得佮失，袂當事事攏像酒蜜100遐爾仔甘甜，雖罔時間會變、人心會變，毋過 不變的是咱的真情久久~「真情99」！

才情(代序)
自序

第一輯 親情
　對一張舊相片講起
　毋甘
1. 爸囝情
行人生的路
2. 母囝情
我欲做好囝
落南的尾幫車
3. 姊妹情
袂使放棄
　甘願剁剁咧予豬哺

第二輯 翁某情
　戇豬仔？戇查某！
　故鄉 我轉來矣
　記持拍毋見

第三輯 師生情
　人欲寫干焦兩撇
　飄撇的少年家
　心目中永遠的第一名

第四輯 朋友情
　紩夢的戀歌
　啉咖啡

第五輯 有情
　走揣心靈的世界
　抾寶
　揹揹仔的囡仔兄囡仔姊
　白白透粉紅粉紅的花

第六輯 真情
　囡仔伴？青梅竹馬？
　兩頓tshinn 一頓tsian 好命？
　臺灣製造
　踅菜市仔

我欲做好囝

大雨落甲phik-phe̍h叫，雷公霆甲khinn-khenn叫，阿蕊仔佇高速公路駛車，雖罔雨遐爾大，雖罔雷公爍爁 予伊誠驚惶，毋過，想著阿雄仔這个後生，伊就啥麼攏毋驚，一直勇敢向前行。
坐佇車內的阿雄仔看雨捽仔捽甲雄戒戒 ，外口嘛是霧嗄嗄。伊想起過去、想著未來，希望這陣大雨會當共過去的種種洗予清氣，希望未來----希望未來莫予阿母操心。阿雄仔有幾若擺一直想欲看車窗仔外口，毋過一直看袂出去，毋知家己的未來佇佗位，敢會像車窗仔外口遐爾霧？
想著昨下昏暗假釋轉來到厝，阿母看著伊轉--來歡喜甲目屎含目墘，閣一直講轉來就好、轉來就好！叫伊迒 過烘爐火了後，隨捀一碗豬跤麵線予伊食，紲落𤆬伊去公媽廳，先點三欉香共祖先稟報阿雄仔這个孫仔轉來矣，閣叫阿雄仔跪落來共祖先懺悔……，種種的動作，毋知已經做過幾擺囉！「希望這是上落尾的一擺」，阿雄仔佇心內共家己按呢講。
車駛落苗栗的交流道了後，一下仔就開始peh山，後--來寬寬仔盤山，愈peh愈懸，這陣，雨沓沓仔較細，來到山頂尾溜的時，雨拄拄好停矣！母仔囝兩人坐車坐幾若點鐘，毋但真忝頭，心肝內嘛亂操操。毋過落車的時，欶一喙新鮮的空氣，跤仔手伸勻一下，煞看著目睭前是一大片開闊、清幽的山坪，閣有青翠、優美的景緻，兩人攏誠歡喜，原來遮就是『晨曦會』。阿雄仔敢若看著拄浮--出來的日頭，嘛看著希望、看著未來。
輔導老師笑頭笑面請in入去會客室坐，閣倒茶請in啉。「老師拜託咧，阿雄仔後擺就望老師共伊牽教囉！」「這請你放心免煩惱！」李老師講解『晨曦會』的同學一工的活動，隨後就𤆬in佇會內四界行行看看咧閣做導覽。
行來到橋頂的時，橋跤有鴨咪仔佇水裡自由自在泅過來泅過去，阿雄仔跤步就按呢停落來，誠細聲講一句「希望我後擺會當像鴨咪仔遐爾仔逍遙快樂」，行做前的老師佮阿蕊仔越頭過來，阿蕊仔講：「阿雄仔行較緊咧喔！」阿雄仔出力共鞋仔底的細粒石頭仔倒倒、敲敲出來，伊嘛希望共心中的心魔擲掉、清掉，按呢頭前的路就會較順、較好行。