商品簡介
接續李江却臺語文教基金會的團隊編輯臺江臺語文學，難免有幾分恐惶，尤其是歷屆的總編輯施炳華教授、詩人陳正雄、施俊州博士前後攏為這本刊物用心深耕過，已經犁出一片豐盛的臺語文學園地，未來欲行的方向，規劃的內容，相信嘛是逐家共同關心的。
現階段，綜合考量於臺文創作發展的情形，一般民眾對臺語文學認捌的程度，佮欲按怎加強發揮刊物流通的機能等幾个要點，咱按算運用過去逐家所拍落來的基礎，構思透過「拓展書寫題材」佮「生活化」的編輯理念，開拓創作領域佮閱讀群，予臺文的創作閣較多元豐富，接近生活層面，予較濟的民眾產生興趣願意閱讀佮交流互動，特別是希望會當吸引少年輩投入參與創作，注入新的活力。
具體來講，這期的主題《城市的情韻》所掠的方向佮意象，就設定佇人佮城市之間的互動，會當用各種角度來書寫家己所生活、熟似關心的所在，臺南也好，臺北也好，彰化屏東花蓮嘛攏各有伊的風韻；城市的歷史地理也好，人情世事也好，美食工藝嘛會當講甲飛天鑽地；佇遮初戀也好，成家立業也好，人生總是有一寡仔經歷予你戀戀難忘的。
欲寫的題材嘛會當延伸甲真闊，比如以在地臺南來講，講著城市的意象，「府城古都」、「臺語文學重鎮」、「人文城市」等攏是逐家普遍有同感的交集，會當論述普世的價值，嘛會當提出獨到的觀點；欲講「歷史地理」會當延伸到臺江內海、西拉雅部落、安平、鹽水月津……等歷史場域，嘛會當紹介現代化的東區、科學園區；欲講「人文藝術」會當探訪滿城濟濟的文學家、音樂家、畫家……等，嘛會當講做布袋戲的藝師，或者文創的設計。希望按呢的主題會當提供較大眾化的「創作的線索佮靈感」，予有興趣的民眾願意投入參與，或者有所迴響、鬧熱的延續落去，講甲無法度收煞嘛無要緊，攏總會當直接間接促動臺文的發展。
因為政治等種種因素的影響，臺語文學的發展一路相當坎坷，一位早期就投入母語運動的詩人前輩講過，文學的成熟發展是長期累積出來的，建立佇一代一代的作品累積出相當的量佮質，會當提供後人充足的養份、肥底，現階段臺文創作猶加減帶有實驗性，先行者愛那行那摸，那摸那行，走揣屬於咱家己的語言特質佮風格。這个話應該嘛猶適用佇遮，所以，逐家毋免客氣，筆攑起來共同來創作，為咱臺文的未來，為咱母語的傳承、發揚。
您曾經瀏覽過的商品
購物須知
為了保護您的權益，「三民網路書店」提供會員七日商品鑑賞期(收到商品為起始日)。
若要辦理退貨，請在商品鑑賞期內寄回，且商品必須是全新狀態與完整包裝(商品、附件、發票、隨貨贈品等)否則恕不接受退貨。